انت ايها المغترب "شو قدمت للوطن؟!" سؤال جارح يتكرر باستمرار.. بقلم الصحفي رامي معالي
نشر بتاريخ: 14 نوفمبر، 2017
رام الله مكس
لما حدا يسألك -وانت شو قدمت للوطن!؟ احكيلو: قدمت على هجرة وتركت الوطن للانتهازيين والمطبلين اللي أكلوه وما خلولنا فيه قشرة بصلة! احكيلو قدمت للوطن دموعي على بعدي عنو، حملته بشنطة سفري بكل مكان بروح عليه، احكيلو المغترب بني آدم من لحم ودم زيو زيك، بس الفرق هو انو انت بشوية علاقات واتصالات قعدت على هالمكتب وصرت توزع وطنية من جيبتك، والمغترب ما لقى معو غير ربو ودعوات الوالدين لحتى عرف يلاقي وظيفة بهالغربة اللي مصوّرها انت وامثالك انها “خيانة وطن”.
بيكفيكم فلسفة وتوزيع صكوك وطنية، جد بيكفي، المغترب ممنوع يعبر عن رأيو بأي موضوع بيمس وطنه ولما يجي يحكي بيصيرو اصحاب “دكاكين الوطنية” يوزعوا باتهاماتهم، واحد بيحكيلو “انت لو فيك خير ما طلعت من بلدك”، والثاني بيحكيلو “تعال احكي من هون يا طخيخ الكيبورد”، وغيرو بيحكيلو “الفلوس غيرتك”.
كل هالاتهامات لأنك مغترب! لأنو المغترب بنظر بياعين هالشعارات خان بلده لأنو سافر منشان يتجوز ويبني بيت ويساعد اهلو، كان لازم يقعد بالدار يبيع حكي وشعارات ويخوّن العالم زيهم لحتى يعجبهم!
