رام الله مكس
هاي الكلمة الي كنت استناها من سنين ، ما عرفت شو احكي للدكتور، كان نفسي احضنه على هالخبرية، واحكي لكل الناس انا بعد 3 سنين زواج حملت! هسا فش حماتي تطلع علي بنص عين وتضل تلمح لزوجي يتزوج وحدة ثانية!
فش سلفاتي يضلهم عالطالعة والنازلة يحكوا عن ولادهم وانا يكون نفسي بولد …. اخيرا رح ارتاح من جارتي الي كل مرة بتزورني بتقلي ما في شي عالطريق… خليني اتصل على زوجي اخبره الخبرية، اتصلت يا الله شو انبسط ، بعد ربع ساعة كان عندي حضني وحكالي واخيرا حيجينا ولد !
مكنتش متوقعة لهفته هاي ، ما عمره حسسني انه بدو ولاد ومتضايق اني ما بجيب ، كان يعاملني بحب واحترام، روحنا على البيت …. واجت حماتي، صارت تلوي ببوزها انه اخيرا حملتي يعني….
يا الله شو كانت فترة الحمل صعبة، مراجعة ودوخة وتفشيش، رجلي تنفخوا؛ نفسيتي متل الزفت ، مع هيك كنت بستنى بابني على احر من الجمر….
واجا موعد الولادة، بس ما صار عندي طلق اضطرو يعملولي طلق صناعي، شفت للموت، وعالفاضي، بالاخر الدكتور حكالي رح نعمل عملية!
بس انا بخاف من العمليات، واخيرا صحيت على صوت ابني بعد التخدير للعملية، كنت دايخة حضنته وحكيت رح اسمي ريان
بس طلع عيني هو نكد وعصبي كتير والمناعه عنده ضعيفة ، حرمت حالي من كثير شغلات عشانه، وانا حاطة كل احلامي في
كبر ريان وصار عريس، ما حدا كان مبسوطله قدي ،بس صرلو اسبوع ما اتصل علي، ولا حتى اجا عندي عالبيت ليطمن عصحتي، ما انا لما ولدته صار عندي ضغط حمل، وصرت اتعب دائما،صرت احكي براسي اكيد هاي مرته الحية مانعته يجي عندي…. صرت اكره مرته ،واضل افسده عليها، وبعد 3 اشهر من زواجهم وهي لسا مش حامل صرت احكيلو تزوج غيرها، صرت اغار منها انه لي كل الاهتمام اخدته ما انا امه، بعد بفترة تعبت كتير وكان ريان مسافر،اتصلت على مرته ، قلتلها اني تعبانة، لقيتها بعد 10 دقايق عندي، وجايبة الدكتور ، ضلت تعتني فيي، تعملي شوربات وكمادات، ويا الله شو كانت حنونة علي، تذكرت كيف انا قابلت المنيح لي عملته باساءة وكيف كنت احرد ابني عليها،وتذكرت حالي كيف لما حماتي كانت تعمل نفس الشي وانا كنت اكرهها … اعتذرت منها … وحكيت صحيح ابني انشغل عني مع اني تعبت علي بس هي كمان مرته وحقها يحبها وينتبه عليها…..
ابنك من حقك عليي يهتم فيكي ، وصحيح تعبتي في ، بس ما بيعني انك تخربيله حياته مع مرته،واذا انني متزوجة تذكري قديش امه تعبت علي ،مش غلط تحكيله جبلها هدية، اتذكررها باتصال، نسهر عندها … هي امه وانتي مرته ! وانت تذكر انها امك ما بتتعوض
#هديل_قاسم
