اتحدى العالم كله وانا وياك !
هالأغنية الي عملتلي عقدة بكل عرس وحدة من صاحباتي وانا لسا قاعدة عند امي وبحلم بالفستان الأبيض
مثلي مثل أي بنت ، بعد ما خلصت جامعة وتوظفت، وصاحباتها بلشو يتزوجوا وحدة ورا الثانية، حتى يوصلها كروت عرس بنات اصغر منها، صار نفسي البس الفستان الأبيض وخاصة انه عمري تجاوز ال25 ، ومجتمعنا ما برحم ! انا بنت عادية، عيوني سود؛ طولي عادي؛ بس ناصحة كان وزني 77 ، وعالطالعة والنازلة عماتي يحكولي انحفي ، هيك ولا حدا “بفصلك”
بنت عمي ، مش مخلصة توجيهي، بس مش ملحقة طلبات، لانه عيونها ملونة، وكتير ناس حكولي انه وجهي احلى من وجهها، واذا ما بدنا نقارن الشكل هي فعليا بنت شعنونة، وحبت نص شباب للبلد ! …. وانا الي كنت اهدي عليها دائما تترك هالقصص لانها صغيرة ، بس ما كانت تهدا بأي عرس؛ تقضيها ترقص من أوله لاخره، وبعدها يبلشوا النسوان يطلبوها؛ وانا ولا وحدة تعبرني … وبالآخر خطبت مهندس بلندن ! ورح تسافر بعدد شهرين 🙂
انا حكيت اكيد العيب فيي، لإني ناصحة، رحت سجلت بالجيم، واخدت رجيم قاسي وبلشت بدي انحف، طبعا بهالفترة ما حدا رحمني كمان، مالك نصحانة؟ كل ما تشوفني وحدة تحكيلي كنك نصحانة !
بس انا بعمل رجيم المفروض انحف ؟ رحت عند دكتورة تغذية حكتلي انه عندي كسل بالغدة، وبدي اتعب زيادة لحتى انحف ، مع هيك استمريت بالرجيم، كنت مبسوطة من حالي ….
بيوم كنت قاعدة انا وأمي بالعرس، اجت ست كبيرة لعنا، حكتلي مرحبا، حكتلها اهلين فكرت انها بدها تخطبني أأشرت عبنت عمتي الي قاعدة عالطاولة معنا وحكتلي بتقربلك هالبنت، قلتلها اه ، سألتني مرتبطة؟ حكتلها لا…. راحت تحكي معها وتركتني، انا كنت اطلع بحسرة، يعني هي بشو احلى مني ، بس عشانها شقرا وبيضا وطويلة! بس حكيت حرام هالحكي كل شي نصيب بكفي هاي اخلاقها منيحة …
ومرت الشهور وصار وزني 65 ، هيك ارتحت شوي من نصاحتي، صارت كل وحدة تشوفني تحكيلي ماله وجهك نحفان مش حلو هيك! انا مكنتش احسه نحفان، صارت امي تاخدني عكل جمعات النسوان، لعل وعسى تزوجني!
اه حسستني اني حمل فوق ضهرها صرت بدي اصير 26 وانا لسا بالدار عندها، وكل يوم بعد يوم تيجي تحكيلي فلانة خطبت وانتي لسا ! صاروا يتقدمولي عرسان، بس والله عاهات مش عرسان، واحد اهله اول شي سألوا كم راتبي؟
حسيتهم بشتروا وظيفة، يومها صرت اطلع بأمي واحكيلها شو هاددد! واعتذرت منهم …
واحد لما قعد معي، بلش يفاصل فيي عالمهر، وكان مبين علي وعاهله بخيلين كثير ….
واكثر شي جلطني، كانوا يتقدمولي معظمهم يا مطلقين يا كبار بالعمر، تقولوا اني خلص كبرت ؛ بستاهلش اخد واحد منيح ! بتذكر مرة واحد عمره 44 ومطلق وعنده ولدين اجا يطلبني، وكان بتشرط بحكي بس لو عيونها ملونين! عاساس يعني هو بنشاف ….
بعد هالمرحلة حسيت بتفاهة الارتباط والمجتمغ كله، حكيت الله ريتني ما اتزوج؛ وقعدت اطور من شغلي ولشتغل عحالي ، توليت منصب نائبة مدير بالشركة، وصار راتبي احسن، ووضعي احسن !
مع هيك كانت كل ما تشوفني وحدة، متى بدك نفرح فيكي، بكرا بتعنسي ! غير امي كل ما اقعد معها تحكيلي ولك بنت جيرانا عمرها 16 سنة وخطبت! يما هاي طفلة حرام تخطب اصلا! قالت مهو زوجها غني، ولا تضل بوجه اهلها مثلك؟
يما كيف بتفكري هالتفكير انتي؟
طبعا مرت جيرانا ما خلت كلمة ما مدحت فيها العريس، قضتها تسمعني حكي، عشان بنتي حلوة وصغيرة الف واحد بتمناها ….
مرقوا السنين ، وانا يئست اني اتزوج ، وخاصة اني قربت عال30 ، بس صرت رئيسة قسم ؛ والكل بحترمني، بيوم وانا مروحة عالبيت ؛كانت بنت جيرانا بتصرخ، وبتحكي الحقير ؛ الخاين، بضل يضربني ؛ مش متحملة العيشة معه، وامها تحكيلها شو تفضحينا وتطلقي؟
وفعليا لانها صغيرة ما اتحملت اكتر معه واطلقت …..
بيوم من الأيام دخل حدا عندي عالمكتب، بدو يشوف رئيسة القسم شخصيا، كان معصب وبصرخ، بحكي وينها، بس فات عندي، صار يحكيلي انه معاملته جننته وابصر ايش، حلينا المشكلة، واعطاني رقمه، وقلي انا دكتور جراحة واعصاب واي شي بتحتاجي بعيد عن المرض انا جاهز !
ضحكت وقلتله بتعملي عملية .. وصرنا اصدقاء …. بعد فترة، حكالي قصته انه متزوج ومرته ميتة بمرض وبعدها ما فكر يتزوج نهائي ، كان عمره 38 وانا 30 ، حسيت بشي جذبني اله، وهو اعترفلي انه حبني!
اجا طلبني من اهلي ، كان واعي لدرجة انه امه ما طلبت ثلاجة، ومواصفات خيالية، هو اختارني لاني انا خطبنا ، وليلة عرسي، قعدت احكيله بتعرف كنت رافضة فكرة اتزوج واحد مرمل؛ حكالي وانا كنت رافض اتزوج بالمرة !
بس نصيبي جمعني بأحلى واوعى واغلى انسانة! قلتله عنجد بتشوفني هيك … قلي وبشوفك احلى من كل شي ….
من اليوم انت الي من اليوم، بايدي المحبس لبسني ! الاغنية لي بحبها حضنته برقصة السلو، حسيت الدنيا كلها مش واسهة فرحتي، حمدت ربنا؛ اني ما تسرعت بهالقرار ، لانه بهالعمر انا لقيت شريك حياتي المناسب الي، الي شاف روحي قبل شكلي وعمري…. واحنا نرقص حكالي اعترفلك انا ما فتت صدفة عمكتبك صاحبتك بعتتني 🙂 حكتله كيف؟ قلي هسا انتي مرتي بدون كيف
سألوني ندمتي لانك تأخرتي بالزواج، قلتلهم لا ، لأنه دائما بنت عمي الصغيرة بتحكي ما حدا عاش حياته مثلك، حققتي كل شي وتزوجتي، صحيح الزواج حلو ؛ بسن اصغر من ال30 بس النصيب احلى، ومع شخص بدوش ثلاجة ” بيضا وطويلة” ، ولا موظفة
وخلي القطار يفوتك … ولا يدعسك .. او تركبي في ويعمل حادث لما يغير اتجاهه ?
كتابة #هديل_قاسم
