رام الله مكس
مين كان يحكي انه ممكن يجي يوم اخسر في سعادتي وحياتي بسبب فيديو انتشر عالفيسبوك! بعد 5 سنين حب، وكفاح ونضال، ونحارب اهلنا لحتى يقبلوا يزوجونا لبعض؛ لأنه وضع خطيبي مش كثير؛ وانا حالتي النفسية ساءت كمان، خطبنا! اول ما خطبنا ، كانت الحياة بينا بتجنن، طايرة من فرحتي، شو بدي احلى من هيك، بالخطبة ما عملنا حفلة، عائلية وبس …. مرت سنة على خطبتنا، وبالآخر قررنا نتزوج، انا طول هالسنة كان وضعي صعب
اجا يوم العرس المنتظر، يا الله شو كنت مبسوطة، اخيرا رح البس البدلة البيضا ،رحت عالصالون، تمكيت عملت تسريحة، واستنتيت احمد لي هو خطيبي ليجي ياخدني …
اجا عالوقت، كانت السيارة مزينة، قلي: طالعة بتجنني حياتي … خجلت وقلتله عيونك … وصلنا القاعة، لسوء حظي واحنا داخلين، انكسر الكعب، حسيت بشي خلل توازني، بس ما بدي اخرب هالفرحة رح احاول امشي طبيعي لاوصل اللوج، بس ما قدرت صرت كل شوي بدي اوقع، الناس كانوا بضحكوا وانا نحرجت كتير، اضطريت اشلح الحذاء ، وامشي بدونه كان فرق الطول واضح كمان، رجعوا يضحكو بصوت اعلى، انا دمعتي نزلت بس احمد مسكني وقلي تعالي تسأليش
بعدها دبروها وجابولي حذاء ثاني ، اجت رقصة السلو؛ قعدت ارقص انا ويا، فجأة قلي مش نفسك احملك؟ قلتله لا ولك … قلي لا بدي احملك … حاول يحملني مرة ومرتين وثلاث وما زبط الوضع! الناس صارت تطلع وتضحك… بعرفش يمكن لانه وزني زايد شوي …. حمدت ربنا انه العرس مش مختلط واني محجبة يعني ما في تصوير …
روحنا على البيت، الساعة 1 بالليل بتصل حدا عأحمد بحكيلو مقاطع عرسكم عالفيسبوك؟ احمد قله شو يزلمة بتمزح معي بنص هالليل؟ قله فوت وشوف الموقع الفلاني …
احمد طبعا توتر عالآخر …. فات شاف لاقى فيديو علي الفين لايك والف كومنت ومليان شيرات … وكله بتمسخروا عالعريس والعروس …. بحلق بعيونه! شاف الفيديو… قال اه هاد انا … جيت انا وقفت ورا اشوف، شفت الفيديو وقعت عالأرض !
صحيت لقيت حالي بالمستشفى، مقدرتش اتحمل حجم المسخرة لي شفتها، انا طول عمري الحجاب ما شلحتخ قدام شباب العيلة اللاقي حالي مسخرة وعالفيسبوك وبيوم عرسي ….
احمد طبعا ما كان جنبي، كان بحاول يتواصل مع الموقع ليحذفو، بس تواصل معهم، لاقى الفيديو بالف مكان، بطل يلحق، صرنا مسخرة العيلة، الكل يتصل يحكيلنا ةلكم شو الي صاير مين صوركم .!
واحنا مش فاهمين اشي، عشنا اول ايام بزواجنا مشاكل ونكد، اللقمة ما نتهنى فيها، صرت اخاف اطلع من البيت ويشووفوني …
كنت افوت اشوف تعليقاتهم، بنات بعملوا منشن لصاحباتهم ،،،، بعملوا شير ويكتبو عروس مسخرة،؛؛، اشي بسب علي لاني شوي وزني زيادة وما قدر يحملني احمد ، شفت تعليقات بتهد جبال ….
احمد مقدرش يتحمل الوضع، قلي هالجيزة منحوسة، وهالشي لي صار رسالة لنبعد عن بعض ؟ بس احمد انا بحبك.. قلي صعب وين ما اروح بتمسخروا علي حتى بللشغل!. رحت عند دار اهلي واطلقنا …..
عشت ايام الله بس بيعلم فيها؛ ويلي الناس من طلاقي ويلي من الفيديو لي لسا بنتشر، حسيت انها الدنيا سكرت بوجهي، وانه لازم خلص انتحر ….
عارفين شو هالقصة خيالية ، بعد ما شفت فيديو لوحدة مش زابط يحملها عريسها وكيف الناس بتتداول الفيديو بطريقة مسخرة واستهزاء كان من الواضح انه العرس مش مختلط وعالاغلب العروس محجبة!
صار في بنات حرام ما بخافوا الله بروحوا على العرس وبصوروا مقاطع يورجوهم لصاحباتهم، وبعدها ينتشر عكل الفيسبوك ليجيب لايكات وكومنتات، والكل بصير يساهم بنشر هالفيديو! او حتى يمكن بنت تصور مش هدفها الآذى بس ينتشر بكل مكان …
جربتوا مرة تفكروا، انه ممكن العروس والعريس يحطوا حالهم بهيك مواقف محرجة وفي غيرهم بصور ويسمحوا بهالشي …
طيب جربتوا تفهموا شعورهم، لو انتو مكانهم شو رح تحسوا، انه هالشي فعليا ممكن يخرب حياتهم !
هالايام نسينا الدين والاخلاق والمبادء وصرنا نحول غيرنا لمسخرة لحتى نضحك ، بدل ما نعمل شير ونكسب اثم اي فيديو لعروسين او اي اشي بقتحم خصوصايات الناس خلينا نعمل تبليغ ونكسب اجر ، ويتسكروا الصفحات الي مستغلين مشاكل وغلطات الناس ليكبروا 🙂
انا بتمنى هالبوست ينتشر بكل مكان وتوصل الفكرة وحتى لو بدون اسمي مش هاممني ! عارفين ليس لانه هاد واقع بنعيشه ويمكن اي حدا فيكم يكون ضحية تصوير مقطع صغير بعرسه المرة الجاي !
#هديل_قاسم
