رام الله مكس
حكالي الدكتور مبروك انتي حامل بس الولد رح يكون مشوه، لأنه انا وزوجي ولاد عم ، وعيلتنا كلها ما بزوجوا إلا لقرايب …. زوجي صار يحكي خلينا ننزل الولد، كيف بدو يعيش مشوه، بس انا رفضت هالشي قلتله هاد روح وحرام اقتلها …. خلال ال9 شهور، بكل فحص كان الدكتور يحكيلي هالولد رح ينولد مشوه…نصيحة نزلي لأنه رح يغلبك كثير … بس انا كيف اتنازل عن قطعة من روحي ، هاد ابني الي كل ليلة بتخيله وبسمع صوته ….
اجا موعد ولادتي ، دخلوني عملية قيصرية لأنه وضع الجنين الصحي مش كثير، وجع الطلق كان وجع لا يطاق؛ حسيت اني رح موت، عيطت وصرخت، بس لما خلص مفعول البنج وشفت ابني ، كل هموم الدنيا راحوا، ابني كان عنده تشوهات خلقية، وتأخر عقلي، حكولي ما رح يكون طفل طبيعي، كانوا الناس بطلعوا علي بحسرة، وانا فرحانة في قد الدنيا….
سميت ابني محمد، محمد كان صعب يرضع مثل الصغار لانه عنده مشاكل بالبلع، كثير دكاترة حكولي ما رح يعيش اكثر من سنة لانه الي مثله ما بعيشوا كثير، واجهت صعوبات بتربايته، ونظرة المجتمع لأله، واجهت مشكلة بتعليمه، لأنه عنده مشاكل بالعقل ، مع هيك ضليت اكافح واناضل ، وكنت دائما فخورة في، لما يحل مسالة رياضيات ولو بسيطة……
اجت ايام صعبة، احتجنا فيها لعمليات كثيرة لحتى يضل عايش كلهم كانوا يحكولي بترتاحي بس انا كنت اعتبره قطعة من روحي واضل ادعيله !
لما صار عمره 18 سنة ، صار وضعه صعب اكثر وصار الوعي عنده يقل، بس الي بحبه في ، انه بين الكل بميزني، بيضحك بوجهي، ومثل الولد الصغير بريئ كثير …
جارتنا الي كانت نضل تسمعني حكي انه ابني عالة وغلطا اني جبته ابنها مسكو بقضية مخدرات، وسجنوا، وبعدها لما طلع من السجن، مرحبا ما بحكي معها صحيح ابني مريض بس ما بئذي حدا ….. وحنون كثير
المجتمع شايف محمد عالة علي، وانا شايفة المجتمع عالة على محمد …. وانا فخورة بابني كثير ، ورح ضل قدمله لاخر لحظة بحياتي !
ولا تنسوا غربوا النكاح … لانه زواج الاقارب بعمل مشاكل
الأم ما في انسان مثلها، ما في حدا بقدر يضحي مثلها، هي لي بتحب ولادها لو شو ما كانوا ؛ الي بتتحمل مرضكم وتأففكم، لي بتحارب لحتى تصيروا اشي مهم بهالدنيا، الام نعمة حافظوا عليها واياكم تزعلوها لو شو ما صار
هيدي امي بتعتل همي
#هديل_قاسم
