رام الله مكس _اتزوجيه يما، خليه يطلعنا من هالمجاعة اللي كاعدين فيها، مال ونسب وعيشة كريمة بتحلم فيها كل بنت. _بس حاسيته كبير كثير ، يعني انا لسه 16 سنه وهو 40, وامي ومش دارس كمان!! والله مش متخيلة انه اتزوج واحد من عمر ابوي!! _ولك اسكتي بلا هبل، هذا اللي بعمر ابوكي هو اللي رح يدللك ويعيشك مثل الاميرات، هو اللي رح يدلعك ويدير باله عليكي، ولا بدك تتزوجيلي ولد مولدن من اللي “بسكطو” بلاطينهم، بعدين بكفي انه من “امريكيا” ومعه هاظا الكرت الإخظر، غير المصاري والمطاعم يللي عنده, وشو بدك بشهادته يختي!! الشهادة ما بتطعمي خبز. _طيب، مممم ومرته ! والله بتذبحني ان دريت عني،بس يلا عنده بنت من عمري بتسلا معها وبتعلمني شوية انجليزي، واصلا وعدني بده يعيشني ببيت “كصر” لحالي. _ترووح توللي ،كال مرته كال، مهو لو فيها خير ما رماها الطير. انتي الصغيرة الحلوة وكل الدلال رح يكون الك، شدي حيلك من اولها واكسري عينها وعين بناتها الكرنبيات. _خلص ماما انا موافقة، بدي اسافر واهج وافقع عيون صحباتي اني تزوجت واحد غني من “امريكيا” واتشنشل ذهب من راااسي لساسي، وبعدين بدي اسحب اخوي رامز لعندي يفتحله مطعم فلافل “هوونا”، وبعدها انتو واحد ورا الثاني. . . . . بعد مرور سنة…. _قلتيلي قصور ومطاعم اااه يمااا، معيشني انا وضرتي وولادها بنفس الغرفة والحمام خشة صغيرة معتمة ،ولا دار الحزين جارنا ابو رجل مسلوخة اللي كنا نحزن عليه ونوديله اكل برمضان، وهالمطاعم اللي عشمنا فيهم طلع بشتغل فيهم حمّال ومرته الجلاية وضمني انا للمجموعة حتى نضف الطاولات، يما بناته كاااسرات بضلوا يكتلوني ويسركوا اواعيي،. ولاااا الاحلى من هيك طلع مش ناافع يما، واذا سمعني بتشكون عوضعه بكوم بكتلني وبحكيلي اني كليلة ادب مش مربية 🙁
ياسمين الخطاب
