رام الله مكس
أول ما تعرفت على سامي حبيته، في شي خلاني انجذب لأله، حسيته بيختلف عن الكل، اولها كنت أهتم في كثير وأضل احكي معه ليل نهار، أحاول اعمل اي شي لألفت انتباهه لإلي، اه نسيت احكيلكم سامي بكون دكتوري بالجامعة ……
كنت أقضيها رايحة جاية عمكتبه ، اسأله عن المادة، ومحاضرته مستحيل أخليها تضيع علي، شوي شوي بلش ينتبه لإهتمامي الزايد في ، ويحكي معي بطريقة بتختلف عن الطلاب …..
كنت اروح عند صاحبتي سهى احكيلها ولك علميني كيف بتخلي شب يحبك ويخطبك مثل ما صار معها، تصير تضحك وتحكيلي انتي وشطارتك ….
انا كنت أحبه هيك لأني حاسسته غير عن الكل ، شفت في شي بتمنى بشريك عمري!
خلص الفصل ، وسامي لسا مو معبرني مثل ما بدي، انا وقتها اكتئبت لأنه رح اتخرج من الجامعة وما رح اشوفه، وصار يجبني دائما طلبات وأرفض ، ونحكي انا وسامي عالخفيف، نصبح عبعض، ونسأل عن احوالنا وبس …
وبعد 3 شهور شفته منزل عصفحته انه خطب، انا وقتها انهرا، تدمرت، حسيت الدنيا سكرت بوجهي ، صرت احاول اقنع حالي انه مش الي، وخلص، بنفس الوقت ما بدي اتزوج بالمرة …. وعملتله بلوك وبطلت اسأل عنه ودخلت ماستر
مرقوا السنين، درست ماستر وخلصت، وعينوني بالجامعة للي كنت ادرس فيها ، معيدة، التقيت انا وسامي بالصدفة مرة ثانية، اول ما شفته تذكرت قديش كنت أحبه، صبح علي وحكالي ريما انتي هون!
ضحكت وقلتله اه صرت معيدة … حكالي اي شي بتحتاجي انا موجود …. وضلينا هيككك … بالصدفة بسمع بنت بتحكي انه الدكتور سامي بجننن وحلو، فانا اطلعت عليها وحككتلها عيب ، هو متزوج عالاغلب، حكتلي البنت لا سألته وحكالي انه كان خاطب وفسخ ….!
انا وقتها رجعلي كل احساسي زمان، حسيت اني بمسلسل تركي، او فلم هندي، يعني معقول يزبط هالمرة، رجعت انا ويا علاقتنا صارت اقوى….
بيوم من الأيام ، قاعدة عمكتبي، شفت بوكية ورد، حامله حدا وداخل، بعد البوكية وقلي : تتتزوجيني؟ انا أغمى علي وقتها وصحيت بعد كم سنة …
بنتي الي عمرها 4 سنين حردانة لأنها بتحب ابن الجيران، وهو مش معبرها … وابوها سامي بحكيلها ، امك حبتني واخدتني ?? انا جحرته ولكك على شو بتربي البنت!
قلي بربيها تكون مبسوطة بحياتها وهي تختار !
النصيب، الحب الصادق؛ والنظرات الي ما بتتكذب، هدول السعادة بالحياة، صحيح يمكن المجتمع يرفض فكرة انك تحبي حدا وتتزوجي، بس يمكن احيانا تزبط ، وطول ما انتي بأدبك وحدودك ، رح تاخدي لي بدك يا، واتذكري الطيبون للطيبات ? … ولو سكر كل شي بوجهك رح يجي لي يعوضك …..
القصة حقيقية
#هديل_قاسم ” عدلت عليها شغلات لتصير قصة”
