رام الله مكس
كانت بتبكي لانه زوجها ضربها، حاسة باهانة كبيرة، وفوق هيك هو مش حاسس انه غلطان، قعدت جنبها وصرت احكي معها، قلتلها ليش ضربك؟ قالتلي كان معصب، واجا يتفشش فيي، وبحكيلي مهو اهلك دفعوني بلاوي لاخدك ! ورجعت تعيط …. بهالوقت رحت لزوجها الا هو بكون قريبي، وقفت قباله وقعدت احكيله…. بتعرف في ام وابو قعدو 10 سنين بحلموا يجيهم ولد او بنت لحتى يكون اخ او اخت لوحيدهم ….وبهالعشرة سنين الأم حاولت تزرع 8 مرات، وكل مرة كان بكلفها مبلغ وقدره، وبالنهاية حملت وجابت بنت اسم الله عليها، امها ما نامت الليل لانها باول شهر كانت تعيط وترتفع حرارتها وابوها كان يشتغل ليل نهار عشان يشتريلها فوط واواعي وتنام ببيت منيح، هالبنت صارت تكبر، عحساب عيون امها وابوها، لانه سهرانين ليل نهار مشانها، خايفين البنت يصرلها شي، اول يوم بالروضة البنت ضلت تعيط عامها وامها تعيط عليها لانه مش قادرة تبعتها للروضة خايفة من الولاد عليها
، واول يوم بصف اول الأم قعدت طول الليل تخيط لبنتها اشي حلو لتلبسه فوق المريول، كانت تروح البنت ،الام تضل تدرس فيها وتغديها، وتدير بالها عليها،
هالبنت كبرت وصارت توجيهي، الابو صار يشتغل اضعاف عشان يجيب لبنته كل شي بدها يا؛ صار ليل نهار حالة طوارئ بالبيت مشان تدرس وتتفوق، هالبنت عندها اخو وحيد؟ كان اخوها يومها معصب عليها، اجا بدو يرفع ايده ويضربها، الاب مسكها وحكاله بكسرلك ياها! ومن يومها الاخ ما مد ايده على اخته، تفوقت بالتوجيهي، ودخلت الجامعة، كان ابوها اولها ما ينام الليل من خوفه على بنته، لانها لساته بنظره صغيرة وجامعة واختلاط ، عارف شو مربي بس خايف ، يضل يتصل يطمن عليها؟ ويحكيلها ديري بالك يابا من ولاد الحرام ، وامها كل اخر ليل تيجي جنب بنتها تحاول تكون صديقتها لحتى تعرف اخبارها، …
هون وقفني وقلي شو بتخبصي انتي؟
قلتله خليني اكملك ….
والبنت كانت تخاف تغلط عشان اهلها مربينها منيح، هاللبنت كان بدها مصروف بالجامعة؛ اواعي ولبس ، بدها مواصلات ، الاخ صار يساعد الابو عشان يصرفة عليها وما يحسسوها انه ناقصها شي، تخرجت البنت؛وتوظفت، صارت تصرف عحالها وبس، وابوها ما يقبل ياخد شي منها، غير يطمن عليها وانها شخصيتها مستقلة وقد المسؤولية، كانت تطلع مع صاحبتها، تشتري اواعي كتير؛ تتسلى، تروح اخر الليل تحط راسها وتنام ؛ وامها الصبح تحضرلها فطورها ، وكانت مدللة عند اهلها مرة تقدملها واحد غبي،
ابوها بالبداية رفضه لانه خايف عبنته؟ بس مع الاصرار والبنت اعجبها الشب وافق الابو، كانت روحه بتطلع مع بنته، وما ينام الليل وهو يحكي بلكي طيب بيوم من الايام زعلها بكلمة ولله بحرقوا هاي حبيبة ابوها، وامها تحكيله لا يزلمة شو يزعلها هو ابن عالم وناس وهي وافقت تتزوج لانها سنة الحياة…..
شايف هالبنت تركت اهلها والعز الي عايشة في عندهم ، ضحت لتعيش معك في بيت غرفتين، ضحت بحياتها طريقة لبسها ، مسؤوليتها، صار كل شي بحياتها غير، لازم تضل مرتبة؛ لازم تعمل الاكل، لازم تشتغل البيت، تداري جوزها، لانها وثقت فيك وحبتك، وحكت اكيد رح تحترمها مثل اهلها ، وتصونها وتحافظ عليها.. ما كان ناقصها شي 🙂 … بس طلعت ما بتستاهلها… لانه الي بمد ايده على مرته مش زلمة … ولي بفكر انه بهال 100 الف الي دافعهم مهر وبيت وعرس اشتراها بكون غلطان لانه اهلها شارييننها وما ببيعوها ابدا !
لكل شب بفكر انه التكاليف الي دفعهن للعرس اشترى فيهم البنت، اهلها دفعوا اكتر وهم ما باعوها هم اعطوك ياها امانة ….
#هديل_قاسم
